Crita Lucu Basa Jawa
Puasa Kaping Pisane ing Wulan
Ramadhan
Aku duwe
crita sing lucu. Nek aku eling-eling kedadeyan iki, aku bisa ngguya-ngguyu
dhewe. Kedadeyan iki tak alami wektu aku isih kelas lima SD ing wulan Ramadhan.
Dina iku
aku puasa kaping pisane. Tangi turu jam setengah papat esuk banjur aku sahur.
Aku sahur lawuhe jangan bening, iwak, lan tempe. Mripatku isih kelap-kelip kaya
lampu disko. Sahur rasane dadi ora tentrem. Sawise sahur aku banjur turu meneh.
Tangi turu meneh jebulane wis imsyak, nanging wetengku isih rada kroncongan.
Owalah, tembe kelingan wektu sahur iku aku agi ora selera mangan. Dadi aku
mangane sethitik, sisane isih lumayan akeh. Eman-eman yakin, padahal lawuhe
enak-enak banget. Hahaha.
Aku banjur
nglaksanaake shalat Subuh. Sawise sholat Subuh, aku adus amarga arep mangkat
sekolah. Nang sekolah, wetengku muni bae “kruyak kruyuk” seru banget. Aku
diguyu kanca-kancaku. Aku isin banget. Jarene kancaku, sajenne pas sahur isih
kurang.
Bali
sekolah wetengku isih dangdutan bae. Adhiku sing paling cilik ora puasa. Adhiku
malah pamer mangan es krim. Nyess, enak banget ya kayane nek aku mangan es
krime adhiku. Saking ngelihe aku turu lan tangi-tangi wis arep buka. Bukane ana
es campur lan panganan enak liya-liyane. Alhamdulillah aku bisa ngrampungake
dina puasa kaping pisan iki. Sawise buka, banjur aku Maghriban lan maca Qur’an
utawa tadarusan.
Jam pitu
kurang sepuluh menit wengi, aku siap mangkat traweh. Sadurunge, aku ngampiri
kancaku sing jenenge Galih Renandi Putra lan Arif Budiman. Omahe kancaku iku edhek
utawa cedhak karo omahku. Sawise ngampiri kancaku banjur mangkat mlaku menyang
mesjid Agung utawa menyang mushola pendopo. Sadurunge traweh aku pancen biasane
dolanan mercon dhisit. Aku ana niat jahat ngerjani Galih. Tak sumed mercone,
maknyuss. Tor! Malah tanganku sing kejeblugan. Tanganku ora papa, nanging
rasane pedes banget. Jebulane sumbu mercone kae endhep. Aku diguyu Galih lan
Arif.
Aku isih
ora kapok, tak tabuh meneh mercone lan langsung tak guwak nang ngarep omahe
wong. Tor! Aku ora ngerti nek nang kana ana wong sing agi turu. Wong iku kaget
lan langsung ndomehi. Aku, Galih, lan Arif banjur mlayu banter banget kaya
pembalap formula siji (F1).
Wis arep
tekan, aku takon marang kancaku ”traweh nang mesjid Agung apa pendopo?”. Galih
mangsuli “nang pendopo bae, sing cepet”. Arif ngomong “alaah, ngarah pacitane
be..”. Pancen nek traweh nang pendopo Kabupaten Kebumen iku enak banget. Wis
cepet, entuk pacitan maning. Pacitan biasane isine roti, bakwan, lan aqua
gelas. Haha, bocah cilik lah ya...
Biasane
ing mushola pendopo ya ana Bu Rustri, yaiku bupati Kebumen wektu iku. Bu Rustri
ana ing shof wadhon.
Traweh
diwiwiti aku, Galih, lan Arif wudhu dhisit. Sawise iku banjur shalat ‘Isya lan
dilanjutake shalat traweh sewelas raka’at.
Nah, pas
arep bali, Galih malah dadi kaya wong bingung. “Cepet lih, wis dienteni kie.”
omongku. Jebulane Galih agi nggoleti sandhale. Hahaha, bali-bali sandhale Galih
rupane wis beda. Sandhale selen! Warnane sih mirip nanging modele beda. Galih
kapok nganggo sendhal apik. Aku lan Arif ngguyu terus nganti tekan omah.
Categories:
Humor
0 comments:
Post a Comment